Kids Ponygruppä Langstrumpf

S' Pony als Ganzes und mit allnä Sinn erläbä. S' Riitä lehrä staht nid im Vordergrund, aber s' Riitä und es Gfühl für d Bewegig vom Pony z entwicklä chund nid z kurz..

Bi dä Kid's Ponynamittäg gads dadrum s Pony und ihri wunderbari Art de Chind chli nächer z bringä. D Chind selid vieli positivi Erläbniss mit und ums Pony sammlä könne, verbundä mit Abwächslig, Freud und Spass.

Thema vom Kid's Namittag

* Ponys kennälehrä

* Spielerisch de Umgang mit em Pony lehrä

* Wissenswärts über Pony's lehrä

Miär gend mit de Ponys go spazierä und rittid i Wald oder machid verschidnigi Spieli am und ufem Pony. A dem Namittag wärdid verschidnigi Berich vo de Entwicklig gförderet.

- Fiin- und Grobmotorik

- Sozialverhaltä vo dä Chind förderä

- Respäckt gägenüber vo Tier lehrä

- Spass erläbä i dä Natur

- Alternativä zum konventionellä Riitunterricht

Für alli Rossbegeischtertä Chind ab Chindsgialter. Immer einisch im Monet, Mittwuch oder Fritig Namittag, vo 13:30 bis 16:00 Uhr. Uf em Hof Oberimatt in Giswil.

Gruppägrössi

E Gruppä bestahd us :

1 Leiteri

1 Pony

4 Chind

( 2 Chind Riitid und 2 Füehrid und i dä mitti wird gwächsled)

Je nach Amäldigä chas pro Namittag oi mehreri Gruppänä mitenand ha.

Dä Itritt isch jederzyt meglich sofärn Platz frii isch. I dr Regel wird am afang vom nä niwä Schioljahr d Gruppä bildet.

Koschtä

Dr Kids Ponynamittag koschted pro Mal 30.- inkl. Znüni

Dr Gsamtbetrag (Anzahl Namittag x 30.-) isch Afang Semeschter fällig.

1.Semeschter * nach de Summerferiä bis zur Fasnachtsferiä

2. Semeschter * nach de Fasnachtsferiä bis zur Summerferiä

Feriä und Fiirtigä richtid sich nachem Schiolplan vo Giswil

Uisrüschtig

S wichtigschtä isch en Riit- oder Velohelm.

Winter: i dä chaltä Jahreszyt eignet sich dä Zwibelä-Look am beschtä. So chame immer wider en Schicht a- oder abziäh. En altä Skiazug, am beschtä zweiteilig. Gioti, warmi und wasserdichti Schio.

Summer: Mit Sunnäcremä igremet isch wichtig. Bi unsicherem Wätter bitte im Rucksack Rägekleider mitgäh. Geigneti Schio am beschtä Knöchelhoch. Mit Zächäspray sehr guet isprayä.